മടിയന്റെ ആശംസകള്‍

എന്റെ കൂട്ടുകാരുടെയും ബ്ലോഗിലെ പരിചയക്കാരെയും കൊണ്ട് ഞാന്‍ തോറ്റു. ഇത്തവണത്തെ ഓണത്തിന് എന്താ ഇത്ര പ്രതേകത?? തിരുവോണനാളില്‍ ഇന്‍ബോക്സില്‍ മെയിലുകള്‍ കൊണ്ട് നിറയുന്നു, സ്ക്രാപ്പുകള്‍ വായിക്കുവാന്‍ സമയം കിട്ടുന്നില്ല. ഇതിനെല്ലാം പുറമേ ചിലര്‍ രാവിലെ തന്നെ ഫോണില്‍ വിളിച്ചു ആശംസകള്‍ നേരുന്നു..സ്വന്തമായി ഒരു ചെറിയ ബ്ലോഗ്‌ ഉണ്ട്..അതില്‍ അവസാനത്തെ പോസ്റ്റില്‍ കമന്റ്സ്ന്റെ മഹാപ്രളയം..എല്ലാം ഓണാശംസകള്‍..എന്നെ മറന്നു എന്ന് ഞാന്‍ കരുതിയ പലരും കമന്റ്‌ ഇട്ടു കഴിഞ്ഞു. മൊബൈല്‍ ഫോണില്‍ മെസ്സേജ്സ് വരുന്നതിന്റെ ടോണ്‍ നില്‍ക്കാതെ അടിക്കുന്നു..ട്യൂബ് ലൈറ്റ് നാലഞ്ച് മിന്നു മിനി ആണ് കത്തിയത് മൊബൈലില്‍ മെസ്സേജ് വരുന്നതിന്റെ ടോണ്‍ ഇതല്ലാലോ...എപ്പോഴാ ടോണ്‍ മാറ്റി ഇട്ടത്??....അയ്യോ...ഇത് സ്ഥിരം രാവിലെ ആറ് മണിക്ക് അലാറം അടിക്കുന്ന ശബ്ദം ആണല്ലോ??. ഇതൊരു സ്വപ്നം ആയിരിക്കല്ലേ എന്റെ കുടുംബവീടിന്റെ അടുത്തുള്ള കാവിലമ്മേ എന്ന് മനസ്സില്‍ പറഞ്ഞു കൊണ്ട് കണ്ണ് തുറന്നു, തൊട്ടടുത്ത്‌ മേശമേല്‍ ഇരുന്ന മൊബൈല്‍ എടുത്തു നോക്കി...ഇന്‍ബോക്സ്‌ കാലി...കാള്‍ ലോഗില്‍ അവസാനം വന്ന കാള്‍ ഒരാഴ്ചക്ക് മുന്‍പ് "സാര്‍, സാറിന്റെ മൊബൈലില്‍ ഇന്‍കമിംഗ് കാള്‍ ഫ്രീ ആണ്, പക്ഷെ ദയവു ചെയ്തു വര്‍ഷത്തില്‍ ഒരിക്കല്‍ ഒരു പത്തു രൂപയ്ക്കു എങ്കിലും ചാര്‍ജ് ചെയ്യണം" എന്നും പറഞ്ഞു കസ്റ്റമര്‍ സര്‍വീസില്‍ നിന്നും വന്നത്...ചാടി എഴുനേറ്റ് കമ്പ്യൂട്ടര്‍ ഓണ്‍ ചെയ്തു (ജാംബവാന്റെ കയ്യില്‍ നിന്നും സെക്കന്റ്‌ ഹാന്‍ഡ്‌ വാങ്ങിയതാ, ഇതിനു മുന്‍പ് ഉപയോഗിച്ചു വന്നിരുന്ന ഗംബുട്ടെര്‍ കമ്പ്ലീറ്റ്‌ ആയിട്ട് പണി മുടക്കി...അടിസ്ഥാനം വരെ ഇളക്കി നോക്കിയിട്ടും ഒരു പിടിയും കിട്ടുന്നില്ല എന്താ കാര്യം എന്ന്...ആദ്യമേ കുറച്ചു പിണക്കങ്ങള്‍ ഉണ്ടായിരുന്നു. എന്റെ അറിവിന്റെ കൂടുതല്‍ കൊണ്ടായിരിക്കും എന്നാ അപ്പോ കരുതിയത്‌. എന്തായാലും അവനെ സ്ക്രാപ്പുകാര്‍ക്ക് കൊടുത്തു ). പുതിയ പുലി ഫട ഫടാ എന്നും പറഞ്ഞു ഓണ്‍ ആകും എന്ന് അറിയാവുന്നത് കൊണ്ട് ടവലും എടുത്തു കുളിമുറിയിലേക്ക് കയറി. പ്രഭാതകൃത്യങ്ങള്‍ കഴിഞ്ഞു വന്നപ്പോള്‍, അവന്‍ ഡെസ്ക്ടോപ്പ് കാണിച്ചു കൊണ്ട് ഇരിപ്പുണ്ട്. ഉടന്‍ തന്നെ മെയില്‍ ഓപ്പണ്‍ ചെയ്തു...ഇന്‍ബോക്സില്‍ മെയില്‍ പോയിട്ട് ഒരു സ്കാം പോലും വന്നിട്ടില്ല. ബ്ലോഗ്ഗില്‍ കയറി നോക്കി ഓണാശംസ പോയിട്ട് ഒരു തെറി വിളി പോലും ഇല്ല. എല്ലാരും എന്നെ മറന്നോ?? അല്ല..എങ്ങനെ മറക്കാതിരിക്കും..വല്ലപ്പോഴും ഒരു മെയില്‍, ഒരു സ്ക്രാപ്പ്, അല്ലെങ്ങില്‍ ഒരു എസ് എം എസ് അതെല്ലാം പോട്ടേ, ഒരു ബ്ലോഗ്ഗില്‍ കയറിയാല്‍ മൊത്തം ഇരുന്നു വായിക്കുകയല്ലാതെ ഒരു കമന്റ്‌ പോലും ഇടാറില്ല...ഇഷ്ടപെടാത്തത് കൊണ്ടല്ല. (മടി...മടി എന്ന് പറഞ്ഞാല്‍ ഗ്ലാസില്‍ ലാര്‍ജ് ഒഴിച്ചിട്ടു അടുക്കളയില്‍ ഇരിക്കുന്ന ഫ്രിഡ്ജില്‍ നിന്നും വെള്ളം എടുത്തു കൊണ്ടു വന്നു ഒഴിക്കാന്‍ മടിച്ചു വെള്ളമില്ലാതെ എടുത്തു കമഴ്തുന്ന മടി). ഇതില്‍ ഏതെങ്കിലും ഒന്ന് ചെയ്‌താല്‍ അല്ലേ എല്ലാപേരും അറിയൂ ഇങ്ങനെ ഒരു ആള്‍ ജീവിച്ചിരിപ്പുള്ള കാര്യം...അപ്പോ മടി കാരണം ആണ് ഇതൊന്നും ചെയ്യാതിരിക്കുന്നത് (സോ, പ്ലീസ്‌, ഡോണ്ട് മിസ്‌ അണ്ടര്‍സ്റ്റാന്റ്).

വൈകിപോയി എന്ന് അറിയാം എന്നാലും ഇരിക്കട്ടെ ഒരെണ്ണം കിച്ചന്റെ വക..

എല്ലാപേര്‍ക്കും എന്റെ ഹൃദയം നിറഞ്ഞ ഓണാശംസകള്‍.