ദേവനന്ദ - എന്നെ കുറിച്ച് റിസര്‍ച്ച് നടത്തുന്ന പെണ്‍കുട്ടി, ഇപ്പോള്‍ അതിന്റെ മുന്നില്‍ പോകണോ?? അതും ഒരു ഹംസം ആയിട്ട് പോവുക എന്ന് വെച്ചാല്‍....മാനം കപ്പല് കയറുമോ??? (ഇന്ന് ഒരു ദിവസത്തേക്ക് മാത്രം) എന്റെ പ്രിയ സുഹൃത്ത് ആയ രമേശന് വേണ്ടി ഒരല്‍പ്പം മാനം പോയാലും വേണ്ടില്ല. ഒന്നുമില്ലെങ്കിലും ഇത് അവന്റെ "സീരീസ്‌" പ്രണയം അല്ലെ? കൂടാതെ..രണ്ടു കുപ്പി...സോറി....നാല് കുപ്പി കള്ളിന്റെ നന്ദി കാണിക്കുകയും വേണം..ലവന്റെ പ്രണയവും അറിയിക്കാം..എന്നെ കുറിച്ച് റിസര്‍ച്ച് നടത്തിയതിന്റെ കാരണവും അറിയാം....നേരെ ചെന്ന് ടീച്ചേര്‍സ് ഉപയോഗിക്കുന്ന കസേര എടുത്തു നന്ദയുടെ മുന്നിലേക്ക് നീക്കി ഇട്ടു അതില്‍ ഇരിന്നു. പുസ്തകം വായിച്ചു കൊണ്ടിരുന്ന നന്ദ ഒന്ന് ഞെട്ടി.....
നല്ല വെളുത്ത് വട്ട മുഖം..ഒരു ചന്ദന കുറി അതിനു താഴെ ഒരു ചെറിയ പൊട്ട്, കഴുത്തില്‍ ഒരു ചെറിയ സ്വര്‍ണ്ണമാല, മഞ്ഞ പട്ട് പാവാട വെള്ള ടോപ്പ്....മൊത്തത്തില്‍ ഒരു നാടന്‍ പെണ്ണിന്റെ ശേല്....രമേശന്റെ സെലക്ഷന്‍ കൊള്ളാം....ഒരു റാഗിംഗ് സ്റ്റൈലില്‍ ആണ് സംഭാഷണം തുടങ്ങിയത്...
ഞാന്‍: ദേവനന്ദ, അതല്ലേ പേര്??
നന്ദ: അതെ.
ഞാന്‍: വലിയ ഭക്തയാണോ?? ദിവസവും അമ്പലത്തില്‍ ഒക്കെ പോകുമോ?
നന്ദ: അത് വീടിന്റെ അടുത്ത് ഒരു ക്ഷേത്രം ഉണ്ട്...
ഞാന്‍: എന്നെ മനസ്സിലായോ??
നന്ദ: കിച്ചന്‍ അല്ലെ??
ഞാന്‍: അപ്പോള്‍ അറിയാം, താന്‍ എന്നെ കുറിച്ച് ഇവിടെ എല്ലാരോടും തിരക്കി എന്ന് അറിഞ്ഞു..എന്താ കാര്യം???
നന്ദ: ഇല്ല..ഞാന്‍ കിച്ചനെ കുറിച്ച് തിരക്കിയില്ല...ആരാ പറഞ്ഞത്??
ഞാന്‍: താന്‍ ആള് കൊള്ളാമല്ലോ വന്നു കയറുന്നതിനു മുന്‍പ് കള്ളം പറയുന്നോ?? ഗീതു പറഞ്ഞല്ലോ താന്‍ എന്നെ കുറിച്ച് തിരക്കി എന്ന്...
നന്ദ: അത് ഞാന്‍ ഈ കോളേജിലെ ഏറ്റവും വല്യ തല്ലിപ്പൊളി ആരാന്ന് ചോദിച്ചപ്പോ കേട്ടത് കിച്ചന്റെ പേരാ, അത്രയേ ഉള്ളു" നിഷ്കളങ്കമായ മറുപടി. സുരേഷ് ഗോപിയുടെ പഞ്ച് ഡയലോഗ് കേട്ട കൊല്ലം തുളസിയുടെ പരുവത്തിലായിപ്പോയി ഞാന്‍ .ചുറ്റും നോക്കി. ഭാഗ്യത്തിന് ആരും അടുത്തെങ്ങും ഇല്ല. ......മനസ്സില്‍ പറഞ്ഞു..."എടീ ഗീതു, കഴുതേ, നിനക്ക് ഞാന്‍ വെച്ചിട്ടുണ്ട്...."
സമനില വീണ്ടെടുത്തു ഞാന്‍ നന്ദയെ നോക്കി...
ഞാന്‍: ശരി ശരി..ഇനി മേലാല്‍ ഇത് ആവര്‍ത്തിക്കരുത് കേട്ടോ??..പിന്നെ തനിക്ക് രമേശനെ അറിയാമോ??
നന്ദ: അറിയാം..ഇന്നലെ വന്നു പരിചയപ്പെട്ടിരിന്നു...
ഞാന്‍: എന്റെ കൂട്ടുകാരനാണ്..അവന് ആള് പാവമാ കേട്ടോ. അവന് തന്നെ ഇഷ്ടമാണ്..അവന് തന്നെ നേരിട്ട് വന്നു കാണും..
നന്ദ: ഞാന്‍... അത്... പിന്നെ....
ഞാന്‍: വേണ്ട വേണ്ട താന്‍ ഇപ്പോള്‍ ഒന്നും പറയണ്ട.....മറുപടി അവന് വരുമ്പോള്‍ പറഞ്ഞാല്‍ മതി കേട്ടോ......അപ്പോള്‍ നമ്മള്‍ക്ക് പിന്നെ കാണാം...
ഇത്രയും പറഞ്ഞു ഞാന്‍ ക്ലാസ്സിനു പുറത്തേക്കു നടന്നു .....ക്ലാസ്സിനു പുറത്തു ചാടിയ ഞാന്‍ ആദ്യം അനേഷിച്ചത് ഗീതുവിനെ ആണ്....ലവിടെ എങ്ങും ലവളുടെ പൊടി പോലും ഇല്ല കണ്ടു പിടിക്കാന്‍.... രമേശന് ഓടി അടുത്ത് വന്നു..."കിച്ചാ എന്തായി??, നീ കാര്യം അവതരിപ്പിച്ചാ?? ഓക്കേ ആണോ??" ........തലയ്ക്കു അടി കിട്ടിയ പോലെ നില്‍ക്കുമ്പോള്‍ ആണ് ഇവന്റെ ഒരു ചോദ്യം....."കാര്യം പറഞ്ഞിട്ടുണ്ട്....മറുപടി നിന്നോട് നേരിട്ട് പറയാനും പറഞ്ഞു" അവന് വാലില്‍ തീപിടിച്ച അവസ്ഥ "കിച്ചാ ഇതെങ്ങിലും ഓക്കേ ആകുമോ?? നാളെ രാവിലെ തന്നെ പോയി ചോദിക്കാം അല്ലെ"............"അവള്‍ക്ക് വീട്ടില്‍ പോയി ആലോചിക്കാനുള്ള സമയം കൊടുക്കണ്ട...കൊടുത്താല്‍ ചിലപ്പോള്‍ അവള് "നോ" എന്ന് ആയിരിക്കും പറയുക..അതുകൊണ്ട് ക്ലാസ്സ്‌ വിട്ട ഉടനെ അവളെ പോയി കണ്ടാല്‍ മതി.....എന്തായാലും എന്റെ റോള് കഴിഞ്ഞു....അപ്പോള്‍ പാര്‍ട്ടി നടത്താനുള്ള കാശ് ഉണ്ടാല്ലോ അല്ലെ??" (അടുത്ത രണ്ടു കുപ്പി കള്ള് കൂടി കിട്ടാനുള്ള വഴി ആണ്..കളയാന്‍ പറ്റുമോ??) "പാര്‍ട്ടിയുടെ കാര്യം നീ എനിക്ക് വിട്ടു താ.........നിന്റെ നാളത്തെ 'ഫുള്‍' ചെലവ് എന്റെ വക"......അവന് ആവേശത്തോടെ ഇതും പറഞ്ഞു സന്തോഷത്തോടെ പോകുന്നത് നോക്കി നിന്നപ്പോള്‍ ആണ് ഞാന്‍ ഒരു കാര്യം ആലോചിച്ചത്....ഒരിക്കല്‍ ഞാനും നിന്നിട്ടുണ്ട് ഇതേ അവസ്ഥയില്‍....."യെസ്" എന്ന മറുപടിയും പ്രതീഷിച്ചു....ഇവനെങ്കിലും ആ അവസ്ഥ ഉണ്ടാകാതിരിന്നാല്‍ മതി....
ദേവനന്ദയെ കാണാന്‍, എനിക്ക് പാര്‍ട്ടിയും വാഗ്ദാനം ചെയ്തു തുള്ളിച്ചാടി പോയ രമേശന് പക്ഷെ അന്ന് വൈകുന്നേരം ബസ്സ്‌സ്റ്റോപ്പില്‍ അവനെ കാത്തു നിന്ന എന്റെ നേരെ വന്നത് ഒരു മാതിരി ചുവപ്പ് കണ്ട കാളയെ പോലെയായിരുന്നു ...രൂക്ഷമായ നോട്ടവും, തരംകിട്ടിയാല്‍ എന്നെ തട്ടും എന്ന മട്ടും.
"എന്താടാ, നീ അവളെ കണ്ടോ" ഞാന്‍ ചോദിച്ചു.
"സത്യം പറയണം നീ അവളോട്‌ എന്താ പറഞ്ഞത്??".. ഒരു നിമിഷം എന്നെ നോക്കി ദഹിപ്പിച്ച ശേഷം കുരയ്ക്കും പോലെ അവന്റെ മറു ചോദ്യം
"അത് രമേശാ, നിനക്ക് അവളെ ഇഷ്ടമാണെന്നും...അതിനുള്ള മറുപടി നിന്നോട് നേരിട്ട് പറയാനും പറഞ്ഞു...എന്താടാ പ്രശ്നം??".
രമേശന്റെ അടുത്ത ചോദ്യം എന്നെ ശരിക്കും ഞെട്ടിച്ചു. "പിന്നെ എന്തിനാടാ അവള്‍ക്കു നിന്നെ ഇഷ്ടമാണെന്ന് എന്നോട് പറഞ്ഞത്???" ഞാന്‍ കേട്ടത് തെറ്റിയോ അതോ അവനു വട്ടായോ എന്ന് ഒരു നിമിഷത്തേക്ക് ഞാന്‍ സംശയിച്ചു.........
നർമ്മം അടിപൊളിയാവുന്നുണ്ട്.
ReplyDeleteകൊള്ളാം.. നല്ല അവതരണം.
ReplyDeleteഎന്റെ ഒരു സുഹൃത്തിന് ഇതേ അവസ്ഥ ശരിയ്ക്കും വന്നിട്ടുണ്ട്.
ReplyDelete